OMMAVIY OFERTA

"Talaba aksiyasi" doirasida ishtirok etish bo'yicha

Mazkur Oferta (keyingi o'rinlarda — "Oferta") "Moomkin" mas'uliyati cheklangan jamiyati (keyingi o'rinlarda — "Tashkilotchi") tomonidan tashkil etilgan "Talaba aksiyasi" (keyingi o'rinlarda — "Aksiya")da ishtirok etish va undagi shartlar bo'yicha muomalaga layoqatli jismoniy shaxslarga (keyingi o'rinlarda — "Ishtirokchi") O'zbekiston Respublikasi Fuqarolik kodeksining 367, 981 va 982-moddalariga muvofiq ommaviy taklif (ommaviy oferta) hisoblanadi.

Ishtirokchining ushbu Ofertada nazarda tutilgan harakatlarni bajarishi uning quyida keltirilgan shartlarga so'zsiz roziligini bildiradi (Oferta aktsepti). Oferta qabul qilingan paytdan boshlab Shartnoma tuzilgan hisoblanadi. Ushbu Shartnomada to'g'ridan-to'g'ri ko'zda tutilmagan barcha masalalarda tomonlar O'zbekiston Respublikasining amaldagi qonunchiligiga va ish muomalasi odatlariga amal qiladilar.

Ushbu taklifning amaldagi redaksiyasi Tashkilotchiga tegishli Moomkin mobil ilovasi, uning Instagram sahifasi hamda rasmiy veb-sayti — www.moomkin.uz da joylashtirilgan.

Oferta 2025-yil 1-noyabrdan boshlab kuchga kiradi va 2026-yil 1-yanvargacha yoki aksiya yakunlanguniga qadar amal qiladi.

1. Umumiy qoidalar

1.1. Aksiya lotereya, bahs, totalizator, qimor yoki tavakkalchilikka asoslangan boshqa o'yin emas, uning shartlari O'zbekiston Respublikasining amaldagi qonunchiligi talablariga muvofiq keladi.

1.2. Aksiya tashkilotchisi: "Moomkin" MChJ (keyingi o'rinlarda — "Tashkilotchi").

1.3. Tashkilotchi rekvizitlari:
STIR: 312136148
Yuridik manzil: Toshkent shahri, Chilonzor tumani, Botirma MFY, 17-mavze, 33-uy, 118-xonadon

2. AKSIYA O'TKAZISH VAQTI

2.1. Aksiya muddati: 2025-yil 1-noyabrdan 2026-yil 1-yanvargacha (keyingi o'rinlarda — "Aksiya muddati" deb yuritiladi).

2.2. Agar ushbu davr mobaynida "Moomkin" ilovasida 100 000 (yuz ming) nafar talaba foydalanuvchi ro'yxatdan o'tmasa, Aksiya muddati avtomatik tarzda yana 1 (bir) oyga uzaytiriladi.

2.3. Aksiya g'oliblarini aniqlash jarayoni 100 000 nafar foydalanuvchi ro'yxatdan o'tganidan so'ng boshlanadi.

2.4. Ushbu Ofertada ko'rsatilgan barcha vaqt birliklari va muddatlar O'zbekiston Respublikasi, Toshkent shahri vaqti bo'yicha hisoblanadi.

3. TASHKILOTCHINING HUQUQLARI VA JAVOBGARLIGI

3.1. Tashkilotchi Aksiyani o'tkazish, uning natijalarini aniqlash hamda sovrinlarni topshirish tartibini mustaqil belgilash huquqiga ega.

3.2. Tashkilotchi istalgan vaqtda Aksiya shartlarini o'zgartirishga, uni muddatidan oldin tugatishga, shuningdek Aksiya to'g'risida qo'shimcha ma'lumotlarni e'lon qilishga haqli.
Aksiya shartlari bo'yicha yangilangan (qo'shimcha) ma'lumotlar Tashkilotchi tomonidan bunday o'zgartirish (yangilash) ma'qullangan kundan boshlab 3 (uch) ish kuni ichida Saytda joylashtirilishi shart.

3.3. Tashkilotchi Aksiya doirasida ishtirokchilar bilan yozma yoki og'zaki muzokaralar olib bormaslik, shuningdek Aksiya natijalari yuzasidan izoh bermaslik huquqini o'zida saqlab qoladi, agar bu ushbu Oferta yoki O'zbekiston Respublikasining amaldagi qonunchiligi bilan nazarda tutilgan hollarni istisno etmagan bo'lsa.

3.4. Tashkilotchi texnik sabablarga ko'ra (shu jumladan, lekin ular bilan cheklanmagan holda: internet aloqasidagi uzilishlar, serverdagi nosozliklar, texnik xatoliklar, uchinchi shaxslarning noqonuniy harakatlari) Aksiyaning vaqtincha to'xtatilishi yoki o'tkazilmasligi uchun javobgar emas, biroq bunday holatlar yuzaga kelgan taqdirda ularni imkon qadar tez fursatda bartaraf etish choralarini ko'radi.

3.5. Tashkilotchi Aksiya ishtirokchilarining noto'g'ri yoki yolg'on ma'lumot kiritishi, shuningdek o'z majburiyatlarini bajarmasligi natijasida yuzaga keladigan har qanday oqibatlar uchun javobgar hisoblanmaydi.

3.6. Tashkilotchi Aksiya doirasida ishtirokchilarning shaxsiy ma'lumotlarini faqat ushbu Ofertada ko'rsatilgan maqsadlarda va O'zbekiston Respublikasining "Shaxsga doir ma'lumotlar to'g'risida"gi Qonuni talablariga muvofiq tarzda qayta ishlash huquqiga ega.

3.7. Tashkilotchi Aksiyaning o'tkazilishi, tashkil etilishi va natijalari uchun to'liq javobgarlikni o'z zimmasiga oladi.

3.8. Tashkilotchi tomonidan ushbu Ofertada nazarda tutilgan barcha majburiyatlar to'liq bajarilgan deb hisoblanadi, agar sovrinlar g'oliblarga belgilangan tartibda topshirilgan bo'lsa.

3.9. Tashkilotchi Aksiya davomida va undan keyin ishtirokchilarning huquqiy da'volariga faqat ushbu Oferta va amaldagi qonunchilik doirasida javob beradi.

4. AKSIYA ISHTIROKCHILARI VA ISHTIROK ETISH TARTIBI

4.1. Aksiya doirasida taqdim etiladigan kontrakt to'lovi bo'yicha sovrin, chegirma yoki boshqa turdagi imtiyozlarning g'olibi faqat O'zbekiston Respublikasidagi oliy ta'lim muassasalarining kunduzgi, sirtqi yoki kechki ta'lim shaklida tahsil olayotgan talaba bo'lishi mumkin. Mazkur yo'nalish bo'yicha g'oliblik talabalik maqomini tasdiqlovchi hujjat taqdim etilgandan so'ng tasdiqlanadi.

4.2. Aksiyada 16 yoshga to'lgan va to'liq huquqiy layoqatga ega O'zbekiston Respublikasi fuqarolari ishtirok etishlari mumkin. Ushbu shaxslar Aksiya shartlarida "Ishtirokchi" deb yuritiladi.

4.3. Aksiya doirasidagi Umra ziyorati yo'llanmasi sovrini barcha Ishtirokchilar uchun ochiq bo'lib, bunda talabalik maqomi talab qilinmaydi. Umra bo'yicha g'olib Aksiya umumiy ishtirokchilari orasidan aniqlanadi.

4.4. Kontrakt bo'yicha sovrinlar talabalarga mo'ljallanganligi sababli, talaba bo'lmagan Ishtirokchilar ushbu yo'nalishdagi sovrinlarni yutib ololmaydi, shuningdek, ularni boshqa sovrin turiga almashtirish yoki pul ko'rinishida tovon sifatida talab qilish huquqiga ega emas.

4.5. Tashkilotchi Ishtirokchilardan shaxsni tasdiqlovchi hujjatlarni, shuningdek kontrakt bo'yicha sovrinlarda ishtirok etish uchun talabalik maqomini tasdiqlovchi hujjatlarni talab qilishga haqli. Hujjatlar taqdim etilmagan taqdirda, Tashkilotchi Ishtirokchini mos yo'nalish bo'yicha g'olib sifatida tasdiqlamaslik huquqiga ega.

4.6. Aksiyada ishtirok etish uchun Ishtirokchi quyidagilarni bajarishi shart:
• "Moomkin" mobil ilovasini yuklab olib, unda ro'yxatdan o'tishi;
• "Moomkin" Instagram sahifasiga a'zo bo'lishi;
• "Moomkin" Telegram sahifasiga a'zo bo'lishi;
• ro'yxatdan o'tish jarayonida barcha zarur shaxsiy ma'lumotlarni to'g'ri va to'liq kiritishi.

4.7. Aksiyada ishtirok etish bepul va ixtiyoriy hisoblanadi.

4.8. Quyidagi shaxslar Aksiyada ishtirok eta olmaydilar:
• Tashkilotchining xodimlari;
• Tashkilotchi bilan affillangan shaxslar;
• Tashkilotchi bilan fuqarolik-huquqiy yoki boshqa munosabatlarda bo'lgan hamda Aksiyani tashkil etish va/o'tkazishda ishtirok etuvchi uchinchi shaxslarning vakillari;
• yuqorida sanab o'tilgan shaxslarning yaqin qarindoshlari;
• fuqaroligi bo'lmagan shaxslar hamda xorijiy davlatlar fuqarolari.

4.9. Ushbu bo'limda belgilangan talab va cheklovlarga javob bermaydigan shaxslar Aksiyada ishtirok etgan taqdirda, Tashkilotchi bunday shaxslarga Aksiyada qatnashish va (yoki) sovrinni olishni rad etish huquqiga ega.

4.10. Ishtirokchi o'z shaxsiy ma'lumotlarining to'g'riligini, ishonchliligini va yangiligini ta'minlash uchun mustaqil javobgar hisoblanadi hamda ushbu Ofertaning barcha shartlarini qabul qilganini tasdiqlaydi.

5. SOVRIN FONDI, G'OLIBLARNI ANIQLASH VA SOVRINLARNI TOPSHIRISH TARTIBI

5.1. Sovrin fondi

5.1.1. Aksiya muddati davomida sovrinlar soni cheklangan bo'lib, u quyidagi asosiy sovrinlardan iborat:
• Asosiy sovrin — talabaning bir yillik o'qish uchun kontrakt to'lovini "Moomkin" tomonidan qoplab berish, biroq umumiy miqdori 40 000 000 (qirq million) so'mdan oshmagan miqdorda.
• Ikkinchi sovrin — Umra safariga 2 kishilik yo'llanma, umumiy qiymati 20 000 000 (yigirma million) so'mgacha bo'lgan miqdorda.

5.2. G'oliblarni aniqlash tartibi

5.2.1. G'oliblar 100 000 nafar foydalanuvchi ro'yxatdan o'tgach, tasodifiy tanlov (random) usuli bilan aniqlanadi.

5.2.2. Tanlovda faqat "Moomkin" ilovasida ro'yxatdan o'tgan foydalanuvchilar qatnashadi.

5.2.3. Tanlov Random.org yoki shunga teng tizim orqali amalga oshiriladi.

5.2.4. Tanlov jarayonida ishtirokchi "Moomkin"ning Instagram va Telegram rasmiy sahifalariga aksiya o'tkazilgan davrda obuna bo'lgan bo'lishi shart.

5.2.5. Dastlab aniqlangan g'olib ushbu shartlarga javob bermasa, u holda zaxira g'oliblar ro'yxatidan navbatdagi nomzod g'olib deb topiladi.

5.2.6. Zaxira g'oliblar tanlovi asosiy tanlov bilan bir vaqtda, shu shartlar asosida amalga oshiriladi.

5.2.7. Tanlov jarayoni "Moomkin" rasmiy sahifalarida jonli efirda o'tkaziladi.

5.2.8. G'oliblarning ismi va familiyasi e'lon qilinganidan keyin 10 ish kunidan oshmagan muddatda tasdiqlanadi.

5.3. Asosiy sovrinni topshirish tartibi

5.3.1. Aksiya g'olibi sifatida tanlangan talabaning bir yillik o'qish uchun kontrakt to'lovi "Moomkin" tomonidan qoplab beriladi, biroq umumiy miqdori 40 000 000 so'mdan oshmasligi lozim.

5.3.2. To'lov bevosita oliy ta'lim muassasasining rasmiy hisob raqamiga o'tkaziladi. Naqd shaklda yoki uchinchi shaxslar orqali to'lov amalga oshirilmaydi.

5.3.3. Agar g'olibning kontrakt to'lovi 40 000 000 so'mdan kam bo'lsa, farq summasi naqd yoki boshqa shaklda to'lanmaydi.

5.3.4. Agar g'olib aksiya e'lon qilinishidan avval kontraktni to'lab bo'lgan bo'lsa, "Moomkin" keyingi o'quv yili uchun kontrakt to'lovini qoplab beradi.

5.3.5. Agar g'olib bitiruvchi kursda o'qiyotgan bo'lsa va keyingi o'quv yili uchun kontrakt to'lovi mavjud bo'lmasa, sovrin 1-darajali qon-qarindoshiga (ota-ona, aka-uka, opa-singil) yo'naltiriladi.

5.4. Ikkinchi sovrin (Umra safari) tartibi

5.4.1. Aksiya doirasida Umra safari — asosiy sovrinlardan biri bo'lib, ikkinchi g'olib uchun 2 kishilik yo'llanma shaklida, umumiy qiymati 20 000 000 (yigirma million) so'mgacha bo'lgan miqdorda taqdim etiladi.

5.4.2. Safar sanasi g'olib e'lon qilingan kundan boshlab 1 (bir) oy ichida belgilanadi.

5.4.3. "Moomkin" bir martalik viza olish xarajatlarini qoplaydi. Agar g'olib birinchi urinishda vizani ololmasa, keyingi arizalar bilan bog'liq xarajatlar uning o'zi tomonidan qoplanadi.

5.4.4. G'olib viza ololmagan taqdirda, Umra sovrini g'olibning 1-darajali qon-qarindoshiga o'tkazilishi mumkin.

5.4.5. Agar g'olib voyaga yetmagan bo'lsa, safar voyaga yetgan hamroh ishtirokida amalga oshiriladi.

5.5. G'olibni tasdiqlash va hujjatlar

5.5.1. G'olib o'zining talabalik maqomini quyidagi hujjatlardan biri bilan tasdiqlashi shart:
• oliy ta'lim muassasasi rahbariyati tomonidan berilgan talabalik guvohnomasi; yoki
• kontrakt shartnomasi va to'lov kvitansiyasi; yoki
• muassasa rahbarining imzosi va muhr bilan tasdiqlangan rasmiy ma'lumotnoma.

5.5.2. Agar g'olib belgilangan muddatda zarur hujjatlarni taqdim etmasa, sovrinni olish huquqidan ixtiyoriy ravishda voz kechgan deb hisoblanadi.

5.5.3. Agar g'olib Aksiya shartlariga zid xatti-harakatlar qilgan bo'lsa yoki yolg'on ma'lumot bergani aniqlansa, Tashkilotchi sovrinni topshirishdan bosh tortish huquqiga ega.

5.6. Sovrin fondini o'zgartirish va javobgarlik

5.6.1. Tashkilotchi sovrin fondining turi, miqdori, tarkibi yoki boshqa xususiyatlarini o'zgartirish huquqiga ega.
Bunday hollarda yangi sovrin qiymati almashtirilgan sovrin qiymatiga mutanosib yoki teng qiymatda bo'lishi shart.

5.6.2. Sovrinlarning ko'rinishi, dizayni va xususiyatlari reklama materiallarida keltirilgan tasvirlardan farq qilishi mumkin, bu Tashkilotchining majburiyatlarini buzish deb hisoblanmaydi.

5.6.3. Sovrin sifatida taqdim etilgan tovar yoki xizmatlarning sifati uchun ishlab chiqaruvchi yoki yetkazib beruvchi javobgar hisoblanadi. "Moomkin" mazkur tovar yoki xizmatlarning sifatiga yoki kafolat muddatiga javobgar emas.

6. SHAXSIY MA'LUMOTLARNI TO'PLASH VA QAYTA ISHLASHGA ISHTIROKCHINING ROZILIGI

6.1. Aksiyada ishtirok etish fakti Ishtirokchining ushbu Ofertada belgilangan barcha shartlarga, shu jumladan, shaxsiy ma'lumotlarini ("SHM") to'plash, saqlash va qayta ishlashga roziligini erkin, aniq, xabardor va ongli ravishda berganligini bildiradi.
Ishtirokchi ushbu rozilikni "Moomkin" platformasi (keyingi o'rinlarda — Tashkilotchi)ga o'z shaxsiy ma'lumotlaridan quyidagi maqsadlarda foydalanish huquqini berish orqali ifodalaydi:
• Aksiya ishtirokchilarini aniqlash, g'oliblarni tanlash va ularga sovrinlarni yetkazish;
• G'olib(lar)ni xabardor qilish, kommunikatsiya o'rnatish va hujjatlarni rasmiylashtirish;
• "Moomkin" ilovasi foydalanuvchilari faoliyatini tahlil qilish, xizmatlar sifatini yaxshilash;
• Tashkilotchining reklama, marketing va axborot kampaniyalarini o'tkazish;
• Soliq va buxgalteriya hisobotini yuritish;
• O'zbekiston Respublikasi qonunchiligi talablariga muvofiq boshqa maqsadlarda.

6.2. Ishtirokchi quyidagi shaxsiy ma'lumotlarining qayta ishlanishiga rozilik beradi:
• familiyasi, ismi, otasining ismi (agar mavjud bo'lsa);
• tug'ilgan sana;
• individual identifikatsiya raqami (IIR);
• aloqa ma'lumotlari (mobil telefon raqami, elektron pochta manzili, yashash manzili);
• "Moomkin" ilovasida ro'yxatdan o'tish paytida ko'rsatilgan foydalanuvchi identifikatori va akkaunt ma'lumotlari;
• sovrinlarni yetkazib berish uchun zarur bo'lgan qo'shimcha ma'lumotlar;
• Ishtirokchi tomonidan ixtiyoriy ravishda taqdim etilgan boshqa ma'lumotlar.

6.3. Ishtirokchi shaxsiy ma'lumotlarini avtomatlashtirilgan va avtomatlashtirilmagan usullar orqali quyidagi harakatlarga rozilik bildiradi:
• yig'ish, qayd etish, tizimlashtirish, to'plash, saqlash;
• yangilash, o'zgartirish, foydalanish, uzatish (shu jumladan, Tashkilotchi vakolat bergan uchinchi shaxslarga);
• bloklash, o'chirish, yo'q qilish;
• shuningdek, O'zbekiston Respublikasi qonunchiligiga muvofiq holda transchegaraviy uzatish (xorijiy serverlarda joylashgan texnik infratuzilmalarga) orqali qayta ishlash.

6.4. Ishtirokchi Aksiyada ishtirok etish davomida o'z shaxsiy ma'lumotlarining to'g'riligini, dolzarbligini va ishonchliligini ta'minlash majburiyatini oladi. Tashkilotchi noto'g'ri yoki yolg'on ma'lumotlar taqdim etilishi natijasida yuzaga kelgan oqibatlar uchun javobgar emas.

6.5. Ishtirokchilarning shaxsiy ma'lumotlari ushbu Ofertada ko'rsatilgan maqsadlarga erishish uchun zarur bo'lgan muddat davomida saqlanadi va qayta ishlanadi. Ma'lumotlar maxfiy hisoblanadi hamda O'zbekiston Respublikasining amaldagi qonunchiligi, xususan, "Shaxsiy ma'lumotlar to'g'risida"gi 2019-yil 2-iyuldagi 547-son Qonun talablariga muvofiq tarzda himoyalanadi.

6.6. Aksiya yakunlanganidan so'ng, Tashkilotchi yoki uning vakolat bergan shaxslari ma'lumotlarni qonunchilikda belgilangan tartibda o'chiradi yoki yo'q qiladi.

6.7. Ishtirokchi o'zining roziligini istalgan vaqtda Tashkilotchiga yozma murojaat yuborish orqali bekor qilish huquqiga ega. Biroq, bunday hollarda Tashkilotchi Ishtirokchini Aksiyada ishtirok etishdan chetlashtirish huquqini o'zida saqlab qoladi.

7. SOVRIN OLISHNING QO'SHIMCHA SHARTLARI VA G'OLIBNING MAJBURIYATLARI

7.1. Ishtirokchi Aksiyada g'olib deb topilgan taqdirda, Tashkilotchi tomonidan taqdim etilgan sovrin (sertifikat, kuponlar to'plami yoki boshqa mukofot shakli) bilan birgalikda rasmiy fotosuratga tushishi lozim.

7.2. G'olib mazkur fotosuratni Instagram o'z shaxsiy sahifalariga joylashtirishi talab etiladi.

7.3. Ijtimoiy tarmoqlardagi ushbu postlarda G'olib tegishli teglar yordamida Aksiya Tashkilotchisining rasmiy sahifalarini belgilashi kerak.

7.4. G'olib sovrinni olgandan so'ng, Aksiya bilan bog'liq ijobiy taassurotlari haqida qisqa post yoki "story" joylashtiradi. Ushbu materiallarda Tashkilotchining korporativ sahifasi belgilanishi va Aksiya nomi ko'rsatilishi kerak.

7.5. G'olib Tashkilotchi tomonidan taqdim etilgan promo (brend) kiyimida yoki atributikasida suratga tushishi mumkin, agar bunday shart Tashkilotchi tomonidan qo'yilgan bo'lsa.

7.6. Ushbu majburiyatlarni bajarmaslik yoki soxta (noto'g'ri) ma'lumot taqdim etish holatlari aniqlanganda, Tashkilotchi sovrinni bekor qilish, g'olib maqomini qayta ko'rib chiqish yoki ushbu Ofertada nazarda tutilgan boshqa choralarni qo'llash huquqiga ega bo'ladi.

8. TASHKILOTCHINING JAVOBGARLIGI VA JAVOBGARLIKNI CHEKLASH

8.1. Tashkilotchi quyidagi hollarda javobgar emas:
• Ishtirokchining Aksiya shartlarini, jumladan, sovrinni olish bilan bog'liq majburiyatlarni bajarmaganligi yoki o'z vaqtida bajarmaganligi uchun;
• Ishtirokchining ushbu Ofertaning mazmuni va Aksiya natijalari bilan tanishmaganligi uchun;
• Aksiya davomida Ishtirokchiga yuborilgan xabarlar, bildirishnomalar, qo'ng'iroqlar yoki elektron xatlar texnik sabablarga ko'ra yetib bormagan hollarda (jumladan, Internet, mobil aloqa, pochta aloqasi yoki firibgarlik holatlari tufayli);
• Ishtirokchi tomonidan sovrinni olish uchun zarur bo'lgan ma'lumotlar to'liq yoki o'z vaqtida taqdim etilmagan hollarda;
• Ishtirokchining shaxsiy yoki aloqa ma'lumotlari noto'g'ri, to'liq bo'lmagan yoki o'zgargan holatlarda;
• Aksiya o'tkazilishida yoki sovrinlarni topshirishda Tashkilotchining nazoratidan tashqarida yuzaga kelgan texnik nosozliklar (mobil aloqa operatorlari, Internet provayderlaridagi uzilishlar, texnik xizmat ko'rsatish va boshqalar) sababli yuzaga kelgan holatlar uchun;
• Aksiyada ishtirok etish yoki sovrinni olish bilan bog'liq ishtirokchining har qanday xarajatlari, yo'qotishlari yoki zararlar uchun;
• O'zbekiston Respublikasi qonunchiligiga muvofiq fors-major holatlari (tabiiy ofatlar, pandemiyalar, urush harakatlari, davlat organlari qarorlari va boshqalar) yuzaga kelganda;
• G'olib tomonidan sovrinni olish uchun zarur bo'lgan hujjatlarni taqdim etish yoki imzolashdan bosh tortilgan hollarda;
• G'olibda shaxsni tasdiqlovchi hujjatlar yoki oliy ta'lim muassasasida o'qiyotganligini tasdiqlovchi rasmiy hujjatlar mavjud bo'lmagan taqdirda.

8.2. Aksiyada ishtirok etish bilan bog'liq barcha xarajatlar (shu jumladan, Internet trafik, mobil aloqa, ma'lumot almashish, xaridlar va boshqa qo'shimcha to'lovlar) ishtirokchining o'z hisobidan amalga oshiriladi.

8.3. Tashkilotchi sovrinlarni olish huquqi bilan bog'liq bahsli vaziyatlarda yakuniy qarorni mustaqil ravishda qabul qilish huquqiga ega. Tashkilotchining qarori yakuniy hisoblanadi va u qayta ko'rib chiqilmaydi.

8.4. "Moomkin" ilovasining yoki uning texnik infratuzilmasining (mobil dastur, serverlar, to'lov tizimlari, ro'yxatdan o'tish jarayoni va boshqalar) ishlashida yuzaga kelgan texnik nosozliklar, dasturiy xatoliklar, ma'lumotlar bazasi yoki Internet aloqasi uzilishlari sababli Aksiya jarayonida yuz beradigan har qanday uzilishlar, kechikishlar yoki xatoliklar uchun Tashkilotchi javobgar hisoblanmaydi.
Bunday holatlar Aksiyani bekor qilish, g'olibni aniqlash natijalarini o'zgartirish yoki ishtirokchilar oldida kompensatsiya to'lash majburiyatini yuzaga keltirmaydi.

9. YAKUNIY QOIDALAR

9.1. "Moomkin" Aksiya shartlariga o'zgartirish kiritish, bekor qilish yoki sovrinlar sonini o'zgartirish huquqiga ega.

9.2. Ishtirokchi ilovada ro'yxatdan o'tish orqali ushbu Ofertani to'liq o'qib chiqqanini va barcha shartlarga roziligini bildiradi.

9.3. Yakuniy g'oliblar e'lon qilingach, 5 ish kuni ichida ular bilan bog'laniladi. Agar bu muddat ichida bog'lanib bo'lmasa, sovrin zaxira g'olibga o'tkaziladi.

9.4. Ushbu Oferta uch tilda — o'zbek, rus va ingliz tillarida tuzilgan. Til matnlari o'rtasida tafovut bo'lsa, ustuvor huquq o'zbek tilidagi matnga beriladi.

10. REKVIZITLAR